ArabComments
Tuesday, February 06, 2007
  حول مواسم الهجرة المغاربية و عابري الأسرّة في أزمنة التيه العربية

هذا الحوار، حول الغربة والإغتراب باللهجة التونسية ، استعيره هنا من المدوّنة التونسية ، مع جزيل الشكر


- لا يا خويا ... ما نمشيش...

- اسمع كلامي ...راهو تحواسة غاديكا تعمل ستة و ستين كيف

- هذية أمريكيا متاعك ما نعفسهاش أبدا ... و كان يصير الّي يصير ...

- يا ولدي نهزّك أنا ... ندور بيك ...إلاّما.. تتفتق بالتحواس ...راهو نعرفها نقبة نقبة !

- هوما يوّكلوا فينا في الخبط ... و أنا ما أحلاني ماشيلهم لعقر دارهم ... أنا يا خويا تعرف جوي...أوروبا : تفدليك الطلاين , السريو متاع الألمان , حرية الفرنسيس, الجو عند السبنيور و الكورة عند الأنقليز .. أنا هذاكا شربي ! نحبهم يا أخي و نحب نزورهم ! تبعني أنا تربح ...

- نتبعك ؟ تي هذوكوم الكل أعجنهم في بعضهم ... ما يجيو شي قدام الأمريكان ... يبلعوهم بلعان و يلعبو بيهم لعب ... و إلا مغشّش عليهم ملّي روفزولك الفيزا وقتها ؟

- نتغشّش امالا لا ؟ شنوة معنتها أنا الكلني...يروفزوني ... ؟؟؟

- ماكش الأول و لا الأخّر الي يروفزوه ...تي ماهو كثرت عندهم الحرقة ... !

- ايه تجي في راسي أنا ؟ قالك الي يحب يمشي ويقعد على راحتوا يقدم في اللوتري ... العرب الكل تبعث و شوفشي تخطف عند واحد و إلا زوز ... يا أخي مضروبين في رواحهم ... سامحني !

- علاه ؟ عجبوك الأوروبيين ... عاملين فيزا شنغان ...فيزا الشنقان ويييي ... قريب باش يطلبوا عليك المضمون متاع جد بوك الأول ... ما خلاّوش ورقة ما طلبوهاش ... تي دخول للجنة ممكن أسهل !

- لا ! سامحني هذاكا... تنظيم !

- تنظيم ؟ يسرقوا في العباد عيني عينك و تقلّي تنظيم ؟ بلاهي على كل فيزا قداش نحّاولك ؟ 100 و إلا 120 دينار ؟ و كي روفزوك ؟ رجعولكش فلوسك ؟

- ما عادش يرجعوا ... بالعاني باش يصفيو ...

- يعطيهم الصحة ... هاو صفاوك حتى أنت ...

- يا أخي على الأقل في أوروبا كي الواحد يكمّل قرايتو ...تسهال ... مش كيفك عامل ماستار في الجغرافية و الأمريكان قالولك لا ...

- محسوب انت خطفتلك أنسكريبسيون في فرانسا ؟ و برّا ما كمّلتش ماستارك في التاريخ ؟

- بارك الله فيهم ...بعثولي و قالولي ...علاش ما قبلونيش و شجعوني ... اما انت, طفاوك جملة !

- و فوق هذا ودونو... توة انت في بالك في أمريكيا عاملين هالعسّة الكل على الحرقة كيما في أوروبا ؟ ما نتصوّرش !

- يظهرلك ! ... ممررين عيشة الميكسيكان ...الي يقرب للحدود ياكل راسه !

- ما نتصورش كان عاملين هالعسة الكل من ناحية البحر كيما عند الأوروبيين ... تي كان جينا حارقين لأمريكيا ...و راسك لا تراهم عسّاسة الحدود البحرية !

- ديييويييو ! كان جينا حارقين لأمريكيا راهم ما فلتوناش ...راهو الكرتوش كلانا ...

- محسوب ... توة هانا نعوموا في وسط المحيط ... زعمة خير مالكرطوش ؟

- يا أخي ... أنا قررت و أنت دليلك ملك ...ماشي من هنا ...قاصد بلاد الأمريكان ...تحب تجي معايا تفضّل ...

- أنا مازلت نخمم ما بين أيطاليا و إلا اسبانيا ...

- و راس خويا كان اتّبعني و تعوم من هنا ... تشيخ في أمريكيا ... راهو موضوع المستار متاعي على أمريكيا ...نعرفها كيما نعرف جيبي !

- لا لا ...ماشي نعوم من الشيرة الأخرى ... عند الطلاين ...بديت نجوع و شاهي مقرونة كيف ما نعرف أنا ....

- دبّر راسك....تذكرني كي تزور برج بيزا ...

- و أنت أبعثلي تصاور البلدان الي باش تزورهم على الايمايل متاعي ماك حافظو

- في الأمان !

- ايا امالا في وديعة ربي !





، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ،،،

Labels: , , , , , , , , , , , , , ,

 
Comments: Post a Comment

Links to this post:

Create a Link



<< Home
سلام ... Salam ... Here are "ArabComments" on trends and events related to our lives, individually as well as collectively as Arabs living in and out of our Arab Home Lands. We speak on love, religion, and politics of "neo-colonialism". We discuss a diversity of issues, ranging from InfoTech and InfoSec, to everyday price of bread, and everyday price of freedom. You are welcome to add your comments, just as long as they are not propaganda,i.e. SPAM, … Peace … سلام

ARCHIVES
Archives
December 2005 / January 2006 / February 2006 / March 2006 / April 2006 / May 2006 / June 2006 / July 2006 / September 2006 / October 2006 / November 2006 / January 2007 / February 2007 / June 2007 / July 2007 / September 2007 / May 2008 /


TechTags !

، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ، ،،،

Powered by Blogger